Војната во Украина продолжува со нови жестоки напади, додека дипломатските тензии меѓу Русија, Украина и западните земји дополнително се зголемуваат. Украинските сили извршија голем напад врз југозападниот дел на Русија, а руското Министерство за одбрана соопшти дека биле соборени повеќе од 500 беспилотни летала.
Во меѓувреме, украинскиот претседател Володимир Зеленски му предал на американскиот претседател Доналд Трамп предлог за ставање крај на војната.
Дополнително се зголемија тензиите меѓу Русија и НАТО по неодамнешните нарушувања на воздушниот простор на Полска и Романија. Амбасадорите на земјите членки на НАТО одржале состанок на кој изразиле целосна солидарност со Полска и Романија.
Од НАТО ја обвиниле Русија дека е целосно одговорна за нарушувањата на воздушниот простор, оценувајќи ги како „опасни и неприфатливи“ и како показател дека Москва е подготвена да презема сè поголеми ризици.
Во Велика Британија, пак, високи воени претставници и дипломати повикуваат на обновување на директните контакти со Русија. Според „Тајмс“, тие предупредуваат дека недостатокот на комуникација го зголемува ризикот од случаен судир што би можел да прерасне во поширок конфликт.
Во меѓувреме, руското Министерство за одбрана соопшти дека руските сили го зазеле селото Шчербакивка во украинската област Харков. Украинскиот медиум UNITED24 Media, сепак, објави дека населбата била раселена и избришана од официјалниот регистар пред речиси три децении и дека повеќе не постои.
Нови тензии се појавија и околу руската „сенка флота“. Рускиот претседател Владимир Путин се закани дека Москва ќе запленува бродови што припаѓаат на европски земји доколку европските држави преземат чекори за заплена на руски трговски бродови.
Заканата следува по плановите на Европската Унија да овозможи продажба на товарот од запленетите руски бродови што ги прекршуваат санкциите. Путин ваквите потези ги нарече „пиратство и разбојништво“ и порача дека Русија „ќе одговори соодветно“.
Изјавите ги дал за време на руските поморски вежби во близина на островот Сахалин, на кои учествува и крстосувачот „Варјаг“.
Во исто време, Шведска планира да ѝ предаде на Украина запленет руски брод за кој постојат сомневања дека бил користен за транспорт на жито од окупираните украински територии.
Тензиите дополнително се зголемуваат и во Далечниот Исток, каде што Русија и Северна Кореја се соочуваат со обвинувања од Киев и Сеул за продлабочување на воената соработка. Руските воени вежби се одржуваат само една недела пред планираните заеднички воени вежби на САД и Јужна Кореја, кои вклучуваат сценарија за можна инвазија од Северна Кореја.
