Бројот на загинати во поплавите и свлечиштата што ги погодија Непал и кинески Тибет се искачи на 750 лица, додека повеќе од 3.000 луѓе се водат како исчезнати, соопштија властите и локалните медиуми.
Во Непал како исчезнати се водат 2.498 лица, меѓу кои има и стотици странски државјани. Кинеските власти, пак, пријавиле 16 загинати и 546 исчезнати во Тибет.
Во спасувачките операции учествуваат речиси 20.000 припадници на безбедносните сили, а досега се спасени повеќе од 8.000 луѓе, јавуваат светските агенции.
Катастрофата во средата ја предизвикало ненадејно рушење на глечер, по што огромен бран вода и наноси се спуштил низ хималајските долини долж границата меѓу Непал и Кина.
Непалските власти издадоа ново предупредување за поплави поради повторното зголемување на водостојот на реките, во момент кога бројот на жртвите од катастрофалните поплави и свлечишта продолжува да расте.
На жителите преку мобилните телефони им биле испратени предупредувања да се преместат на повисоки и побезбедни места.
На тибетската страна, кинеските државни медиуми известиле дека беспилотни летала за надзор во саботата вечерта регистрирале формирање на ново езеро, откако свлечиште создало природна брана во близина на граничниот премин Ѓиронг.
Поради опасноста од пукање на природната брана, спасувачките екипи во близина на граничниот премин биле преместени на побезбедни локации.
Во меѓувреме, непалските спасувачи се обидуваат да стигнат до повеќе од 100 работници од хидроцентрали за кои се верува дека се живи, но се заробени во тунели исполнети со кал и отпад.
Спасувачките екипи се концентрирани на неколку хидроенергетски проекти долж реката Тришули, каде што за време на поплавите исчезнале повеќе од 900 работници.
