Вишиот суд во Белград донесе нова првостепена пресуда против родителите на Коста К., момчето кое на 3 мај 2023 година уби десет лица и рани уште шестмина во основното училиште „Владислав Рибникар“ во Белград.
Таткото, Владимир Кецмановиќ, е осуден на 14 години и шест месеци затвор за занемарување и злоупотреба на малолетно лице, како и за тешко дело против општата безбедност. Мајката, Миљана Кецмановиќ, доби казна затвор од две години и 11 месеци поради занемарување и злоупотреба на малолетно лице.
Станува збор за втора првостепена пресуда во овој случај, откако Апелацискиот суд претходно ја укина првата одлука и наложи повторување на постапката. И обвинителството и одбраната имаат право на жалба до Апелацискиот суд во Белград.
Главниот јавен обвинител, Ненад Стефановиќ, во завршните зборови побара максимални казни за двајцата родители. Одбраната, пак, тврдеше дека обвиненијата не се докажани и побара ослободителни пресуди.
Во трагедијата што ја потресе Србија, тогаш 13-годишниот Коста К., со пиштол во сопственост на неговиот татко, уби осум ученички, еден ученик и училишен чувар, а рани уште пет ученици и наставничка по историја.
Бидејќи во моментот на злосторството немал наполнети 14 години, според српското законодавство не може кривично да одговара. По настанот беше сместен во специјализирана психијатриска установа, каде што и натаму се наоѓа под надзор.
Обвинителството оцени дека родителите имале законска и морална обврска да го воспитуваат и насочуваат своето дете, поради што и се товареа во овој судски процес.
