Денеска продолжува судењето на Миљана и Владимир Кецмановиќ, родителите на момчето кое го изврши масакрот во Основното училиште „Владислав Рибникар“ во Белград, а на рочиштето се очекува да бидат прикажани фотографии од местото на злосторството.
На судењето ќе присуствуваат и родителите на убиените деца, поради што се очекува рочиштето да биде особено емотивно и потресно.
Масовното убиство во училиштето „Владислав Рибникар“ се случи на 3 мај 2023 година, кога тогаш 13-годишниот К.К. со пиштол на својот татко уби девет ученици и чувар на училиштето, а рани уште пет деца и една наставничка.
Апелацискиот суд ја укина првостепената пресуда против родителите и постапката ја врати на повторно судење.
Во повторениот процес, на претходното рочиште сведочеше и самиот К.К.
Владимир Кецмановиќ првостепено беше осуден на 14 години затвор за тешко дело против општата сигурност, додека Миљана Кецмановиќ доби казна од три и пол години затвор поради недозволено поседување оружје и занемарување малолетно лице.
По одлуката за повторување на судењето, Анѓелко Аќимовиќ, татко на убиената Ангелина, изјави дека за семејствата е многу тешко повторно да влезат во судница.
„Многу е потресно повторно да поминуваме низ сè. Не гледам што ново би можело да се појави освен доказите што веќе беа изведени“, изјавил Аќимовиќ.
Тој тогаш додал дека очекува новиот судија да покаже повеќе разбирање за потребата родителите да ги кажат своите сознанија и да помогнат во расветлувањето на трагедијата.
Судијата претходно соопштил дека К.К. има статус на оштетен, бидејќи обвинителството ги товари неговите родители дека го занемарувале и злоставувале.
Владимир Кецмановиќ беше уапсен на денот на масакрот и оттогаш се наоѓа во притвор, од каде што и денеска ќе биде донесен во судницата.
Миљана Кецмановиќ се брани од слобода, но има забрана за контакти и средби со својот син, кој од 3 мај 2023 година се наоѓа во специјализирана здравствена установа.
