Владејачката партија Тисза во Унгарија поднесе предлог-закон за сеопфатна реформа на јавните медиуми, кои со години беа предмет на критики од домашната и меѓународната јавност поради наводна политичка пристрасност во корист на поранешниот премиер Виктор Орбан.
Реформата беше едно од клучните ветувања на премиерот Петер Маѓар, чија партија убедливо победи на изборите во април и обезбеди уставно мнозинство во парламентот.
Според предлогот, главната цел е создавање независен, транспарентен и одговорен јавен медиумски сервис.
Една од најзначајните промени се однесува на реорганизацијата на медиумскиот холдинг МТВА, кој моментално управува со јавните медиуми. Планот предвидува раздвојување на радиодифузниот дел од националната новинска агенција МТИ, која повторно би функционирала како самостојна институција.
Законот предвидува и формирање Независен одбор за јавни медиуми, кој ќе има задача да ја штити уредувачката независност, да го надгледува работењето и финансиите на јавните медиуми и да учествува во изборот на раководството.
Одборот ќе биде составен според принцип на рамноправна застапеност, со еднаков број претставници од власта и опозицијата, како и независни членови од медиумскиот сектор.
Дополнително, ќе биде формиран и Совет за јавни медиуми кој ќе го следи почитувањето на принципите на јавниот сервис врз основа на посебна Повелба за јавна служба.
Со законот се предвидуваат измени и во Медискиот совет при Националната управа за медиуми и комуникации, со цел да се обезбеди порамноправен состав, поголема транспарентност при носењето одлуки и построги правила за спречување судир на интереси.
Една од важните одредби е и престанок на мандатите на сегашното раководство на јавните медиуми.
Во преодниот период, надзорот над реформите ќе го врши министерот за култура Золтан Тар, додека новото раководство ќе биде избрано преку јавен и отворен конкурс.
