Нови 146 места за најмалите во Карпош: Градинката „Пролет 2“ добива нов лик

Изградбата на новата детска градинка „Пролет 2“ во населбата Козле се одвива со засилена динамика, а објектот ќе обезбеди современи услови за згрижување и престој на 146 деца.

Градоначалникот на Општина Карпош, Сотир Лукровски, заедно со министерот за социјална политика, демографија и млади, Ѓоко Велковски, извршија увид во тековните градежни активности.

— реклама —

Новата градинка ќе биде изградена според современи стандарди и ќе располага со вкупно 2.700 квадратни метри површина, вклучувајќи ги и подземните и помошните простории.

— реклама —

Според проектот, објектот ќе има 1.100 квадратни метри приземна површина со сместувачки капацитети, 1.000 квадратни метри на првиот кат наменети за згрижување на децата, како и подземен паркинг со површина од 600 квадратни метри.

По увидот во градежните работи, во административната зграда на Општина Карпош се одржа и работна средба меѓу градоначалникот Лукровски, министерот Велковски и нивните работни тимови.

— реклама —

На состанокот биле разгледани актуелните потреби и предизвици во областа на социјалната и детската заштита, како и можностите за реализација на нови заеднички проекти.

Посебен акцент бил ставен на подобрувањето на условите за престој и згрижување на децата во градинките, како и на унапредувањето на условите за живот и престој на повозрасните сограѓани во Домот за стари лица „Мајка Тереза“ во Бардовци.

Од Општина Карпош посочуваат дека продолжуваат со инвестициите во инфраструктурата, подобрувањето на условите во воспитно-образовните установи и унапредувањето на квалитетот на живот на сите жители.