Од денес започна примената на Системот за влез и излез, нов механизам за евиденција на патниците на надворешните граници, со кој се воведува понапреден начин на контрола и следење на движењето на лицата.
Системот предвидува електронско регистрирање на влезот и излезот на патниците, при што се заменува досегашното рачно ставање печати во патните исправи. Со ова, надлежните институции ќе имаат попрецизни податоци за престојот и движењето на странските државјани.
Системот ќе овозможи автоматско следење на времетраењето на дозволениот престој, како и навремено откривање на лица кои го пречекориле дозволениот рок за престој.
Воведувањето на овој систем е дел од пошироките напори за зајакнување на безбедноста и подобрување на контролата на границите, како и за усогласување со современите европски стандарди за управување со миграциите.
Надлежните најавуваат дека во почетниот период се можни одредени задржувања поради прилагодување на новиот систем, по што се очекува побрза и поефикасна контрола на патниците.
