Нови санкции, нова закана за Ормускиот Теснец: Иран најавува двегодишна стратегија

Иран тврди дека има двегодишен план за справување со новите американски санкции, откако Вашингтон започна нова кампања за економски притисок врз Техеран.

Иранскиот министер за економија Али Маданизадех изјави дека земјата е „целосно подготвена“ за новите мерки и оцени дека и овој обид на САД ќе заврши без успех.

— реклама —

„Владата е подготвена и има двегодишен план за управување со овие настани. Имаме сопствени алатки и знаеме како да ја играме оваа игра“, изјави тој за иранската државна телевизија.

Од Вашингтон, пак, најавија нова операција наречена „Economic Outcast“, со која САД сакаат дополнително да го изолираат Иран од глобалниот финансиски систем. Американскиот министер за финансии Скот Бесент изјави дека целта е да се прекинат економските врски што му овозможуваат на Техеран да функционира.

— реклама —

Американското Министерство за финансии ги прошири можностите за воведување санкции и врз дигиталниот имот, технологијата, златото, воздухопловството и поморскиот сообраќај, а санкционираше речиси 60 компании, лица и бродови поврзани со Иран.

— реклама —

Техеран смета на поддршката од Кина и Русија. Кина веќе порача дека санкциите и економскиот притисок не придонесуваат за решавање на проблемите и најави мерки за заштита на сопствените интереси. Кина е особено важна за Иран бидејќи најголем дел од иранската нафта се извезува на кинескиот пазар.

Во меѓувреме, Иран повторно ги предупреди бродовите да не минуваат низ Ормускиот Теснец без дозвола, а се заканува и со целосен прекин на извозот на нафта од регионот доколку конфликтот продолжи.

Низ Ормускиот Теснец вообичаено минува околу една петтина од светската трговија со нафта и гас, поради што секое нарушување на сообраќајот има директно влијание врз цените на енергентите.

Аналитичарот Дејвид Оксли од „Capital Economics“ смета дека ефектот од новите санкции може да биде ограничен, бидејќи и досега иранскиот извоз на нафта бил значително ограничен, а околу 90 отсто од него завршува во Кина.