Нови тензии во Азија: Кина испрати бродови источно од Тајван

Кина соопшти дека започнала „специјална поморска операција“ во водите источно од Тајван, дополнително заострувајќи ги тензиите во регионот по неодамнешниот договор меѓу Јапонија и Филипини за продлабочување на безбедносната соработка.

Според кинеската новинска агенција Синхуа, Министерството за транспорт во саботата организирало специјална операција за контрола на поморскиот сообраќај, со цел спроведување на кинеската поморска јурисдикција и заштита на националните интереси.

— реклама —

Потегот на Пекинг доаѓа откако Токио и Манила најавија почеток на преговори за разграничување на поморските зони во водите источно од Тајван и натамошно продлабочување на соработката меѓу нивните одбранбени сили.

Кинеските власти оценија дека овие разговори „сериозно го нарушуваат територијалниот суверенитет и поморските права и интереси на Кина“.

— реклама —

Во операцијата учествувале поморски агенции од провинциите Фуџијан и Гуангдонг, како и сили од Источнокинеското Море.

— реклама —

Ова не е прв ваков потег на Кина. Уште на 1 јуни кинеската крајбрежна стража испрати патролни бродови источно од Тајван во рамките на, како што беше наведено, активности за спроведување на законот.

Новите тензии следуваат по средбата меѓу јапонската премиерка Санае Такаичи и филипинскиот претседател Фердинанд Маркос Помладиот, по која двајцата лидери ја нагласија важноста од зајакнување на поморската безбедност во регионот.

— реклама —

Филипинскиот претседател неодамна изјави дека неговата земја најверојатно би била вклучена доколку дојде до конфликт околу Тајван, додека јапонската премиерка претходно оцени дека евентуална кинеска инвазија врз Тајван би можела да биде причина за ангажирање на јапонските вооружени сили.

Тајван, кој има сопствена влада и демократски институции, Пекинг го смета за дел од кинеската територија и не ја исклучува можноста за употреба на сила за воспоставување контрола врз островот.