Новинари прикажани обесени на дрво: хрватската полиција упаси функционер поради закани кон 11 новинари

Хрватската полиција уапси 29-годишен маж осомничен дека преку социјалните мрежи упатувал закани кон 11 новинари и еден политички аналитичар. Според неофицијалните информации на „Слободна Далмација“, станува збор за Иван Ринчиќ, генерален секретар на навивачката група „Торцида“ од Сплит.

Апсењето следува по објава на социјалните мрежи од 18 октомври, во која биле објавени фотографии од новинарите и аналитичарот под наслов „12 јавачи на хрватската апокалипса“, придружени со порака што полицијата ја оценила како директна закана.

— реклама —

„Хрватска веќе виде секакви чуда, но не најде доволно јажиња за толку Јуди“, гласела пораката објавена покрај колажот.

Меѓу лицата чии фотографии биле објавени се новинари од хрватските медиуми „Индекс“, „24сата“, „Телеграм“ и „Слободна Далмација“, како и политичкиот аналитичар Жарко Пуховски.

Од хрватската полиција соопштија дека по спроведената криминалистичка истрага, осомничениот бил предаден на притворски надзорник, а против него е поднесена кривична пријава до Општинското државно обвинителство во Сплит.

— реклама —

„Полициските службеници спроведоа криминалистичка истрага над хрватски државјанин роден во 1997 година, поради сомнение дека сторил кривично дело закана на штета на 11 новинари и еден политички аналитичар“, соопшти полицијата.

Спорните објави се појавиле на фејсбук-страницата „Народни репортери“, каде што новинарите и аналитичарот биле обвинети за наводна поврзаност со српската разузнавачка служба БИА, без да бидат понудени докази за таквите тврдења.

— реклама —

Следниот ден, во фејсбук-групата „Торцида Сплит 1950“, биле објавени дополнителни заканувачки содржини, меѓу кои и фотографија од транспарент на кој новинарите биле прикажани обесени на дрво.

Во меѓувреме, полицијата во Загреб привела и друго лице поради коментар под една од објавите, во кој се повикувало на составување список за отстрел.

„Се надевам дека некој ќе се сети, по примерот на Украинците, да направи список за отстрел“, напишал корисникот.

Заканите ги осуди и меѓународната новинарска мрежа SafeJournalists, која побара реакција од надлежните институции и предупреди дека ваквите објави претставуваат сериозен облик на заплашување на новинарите поради нивната професионална работа.

Иако хрватските медиуми го идентификуваат приведениот како функционер на „Торцида“, полицијата во официјалното соопштение не го објавила неговиот идентитет.