Нафтените пазари повторно реагираа со раст на цените по најновата размена на напади меѓу САД и Иран, и покрај најавите дека двете земји ќе ги продолжат дипломатските разговори.
Цената на суровата нафта од типот Брент на лондонската берза се зголеми за 0,75 проценти и достигна 72,55 долари за барел. Истовремено, американската лесна нафта поскапе за 1,24 проценти, достигнувајќи 70,10 долари за барел.
Тензиите повторно се разгореа откако Иран нападна контејнерски брод, по што САД извршија воздушни удари. Следуваше нов напад од Техеран врз брод што транспортирал катарска нафта, а Вашингтон одговори со дополнителни воени акции.
Инвеститорите се загрижени дека натамошната ескалација би можела да предизвика нови нарушувања во пловидбата низ Ормускиот Проток, кој претставува една од најважните светски поморски рути за транспорт на нафта и природен гас.
Иако по привременото смирување дел од бродскиот сообраќај е обновен, бродските компании и натаму се внимателни, а значителен број пловила сè уште се наоѓаат во Персискиот Залив.
Американски и ирански претставници се очекува повторно да седнат на преговарачка маса во Доха, каде што безбедноста на Ормускиот Проток ќе биде една од клучните теми. Аналитичарите предупредуваат дека сè додека не се постигне траен договор, енергетските пазари ќе останат чувствителни на секоја нова ескалација.
