Ново откритие на научниците од Јапонија: Клетките на ракот би можеле сами да се уништат

Јапонски научници истражуваат нов пристап во лекувањето на ракот, со кој токсични супстанции би се создавале директно во канцерогените клетки, со цел нивно уништување и минимално оштетување на здравото ткиво.

— реклама —

Истражувањето го спровел тим од јапонскиот институт RIKEN, предводен од научникот Кацунори Танака, а резултатите се објавени во научното списание „Nature Communications“.

Експерименталниот метод се потпира на јаглерод моноксидот, кој одредени видови канцерогени клетки го произведуваат во поголеми количества. Научниците развиле специјално соединение на паладиум, кое со помош на протеинот албумин се внесува во клетките и предизвикува хемиска реакција при која се создава супстанција способна да ги уништи.

— реклама —

Методот бил испитан во лабораториски услови врз човечки клетки од рак на црниот дроб, дојката, грлото на матката и белите дробови. Резултатите покажале дека реакцијата била поизразена во канцерогените отколку во испитуваните здрави клетки.

— реклама —

Истражувачите сметаат дека пристапот би можел да придонесе за развој на попрецизни терапии против ракот, со помало оштетување на здравото ткиво.

Сепак, методот сè уште е во рана експериментална фаза и не е испитан врз животни или луѓе. Потребни се дополнителни истражувања за да се утврдат неговата безбедност и ефикасност.

Засега не станува збор за готов лек, туку за научен пристап што отвора можност за понатамошно истражување на селективното уништување на канцерогените клетки.