„Нула толеранција за криминалот и корупцијата во затворите“, вели Шасивари

Борбата против организираниот криминал и корупцијата во затворите е меѓу приоритетите во реформата на пенитенцијарниот систем, порача министерот за правда Јетон Шасивари на Регионалната конференција „Организиран криминал во затворите – зајакнување на интегритетот, разузнавачките капацитети и соработката во Југоисточна Европа“.

Шасивари нагласи дека криминалните мрежи дејствуваат преку границите и ги користат слабостите на институциите, поради што е неопходен заеднички регионален одговор.

— реклама —

„Криминалните мрежи не познаваат граници. Тие комуницираат преку границите, ги користат слабостите на институциите и ги поврзуваат своите активности во повеќе држави. Затоа и нашиот одговор мора да биде регионален“, порача Шасивари.

Тој посочи дека се потребни побрза и поефикасна размена на разузнавачки информации, подобра координација меѓу институциите, заеднички проценки на безбедносните и корупциските ризици, како и заедничко јакнење на капацитетите на пенитенцијарните системи.

— реклама —

Во изминатиот период, како што информира министерот, преземени се конкретни мерки за зајакнување на системот. Вработени се 100 нови службени лица, воведени се специјализирани антикорупциски обуки, а формирани се и единици за затворско разузнавање во КПД „Идризово“, затворите во Штип и Прилеп и во Затворот Скопје.

— реклама —

Паралелно се работи и на професионализација на управувањето со затворскиот систем преку подготовка на законски измени со кои раководните позиции во затворската полиција би ги преземале искусни професионалци од системот.

Во делот на подобрувањето на условите во затворите, обезбедени се 25 милиони евра за изградба на објекти во КПД „Идризово“, во рамки на проект вреден 46 милиони евра. Целта е создавање побезбедни и посоодветни услови согласно европските стандарди.

— реклама —

Шасивари го истакна и значењето на пробацијата и електронскиот надзор како важен дел од современата пенитенцијарна политика. Во 2025 година е изречена првата пресуда за куќен затвор со електронски надзор, а досега се донесени 11 судски одлуки за примена на оваа мерка.

„Ниту една држава не може сама да се справи со организираниот криминал. Ни треба побрза размена на разузнавачки информации, подобра координација и заедничко градење на капацитетите. Безбедноста на нашиот регион е заедничка одговорност“, порача министерот Шасивари.