Поранешниот американски претседател Барак Обама оцени дека САД по конфликтот со Иран се наоѓаат во иста, па дури и полоша позиција отколку пред почетокот на војната што ја иницираше актуелниот претседател Доналд Трамп.
Во интервју за емисијата „Тудеј“, Обама изјави дека САД вложиле огромни финансиски и воени ресурси во конфликтот, без да постигнат значителен напредок.
„Водевме војна, потрошивме милијарди долари, ја изложивме нашата војска на огромен товар и многу луѓе загинаа. А сега изгледа дека сме повторно таму каде што бевме пред почетокот на војната, можеби дури и во полоша ситуација“, рече Обама.
Тој го поздрави прекинот на огнот меѓу САД и Иран и изрази надеж дека договорот ќе остане во сила, но истовремено ја доведе во прашање оправданоста на воената интервенција.
Обама потсети и на нуклеарниот договор со Иран, постигнат во 2015 година, за време на неговиот мандат, според кој Техеран се обврза да не развива нуклеарно оружје.
Според него, одлуката на администрацијата на Трамп во 2018 година да се повлече од договорот придонела Иран да ги зголеми своите нуклеарни капацитети.
„Иран тогаш се согласи да не развива нуклеарно оружје. Повлекувањето од договорот доведе до ситуација во која Техеран разви поголеми нуклеарни капацитети“, изјави Обама.
Во меѓувреме, Трамп потпиша меморандум за разбирање со Иран, со кој двете страни добиваат рок од 60 дена за постигнување подолгорочен договор што би требало трајно да го реши спорот околу иранската нуклеарна програма и да придонесе за стабилизација на односите.
