Поранешниот американски претседател Барак Обама предупреди дека брзиот развој на вештачката интелигенција може да стане опасен доколку навреме не бидат воспоставени правила за нејзина контрола и ги повика демократите во САД да ја постават оваа технологија меѓу главните политички приоритети.
Обама ги изнел ставовите на затворен донаторски собир во Менхетен, каде што разговарал со лидерот на демократите во Претставничкиот дом, Хаким Џефрис. Детали од разговорот беа објавени во делумен транскрипт од канцеларијата на поранешниот претседател.
„Оваа технологија во приватни раце се развива многу брзо и, ако не преземеме контрола, мислам дека може да стане опасна“, предупредил Обама.
Сепак, тој не зазел став дека развојот на вештачката интелигенција треба да биде запрен. Напротив, оценил дека со соодветни правила технологијата може да донесе огромни придобивки.
„Ако го направиме тоа, верувам дека ќе биде корисна. Искрено мислам дека, на пример, ќе го забрза развојот на лекови и ќе ни помогне во лекувањето болести. Верувам дека може да ни помогне и во пронаоѓањето патишта кон иднина со чиста енергија“, рекол Обама.
Поранешниот американски претседател му препорачал на Џефрис демократите да подготват јасна рамка за јавна дебата за вештачката интелигенција, особено доколку по изборите ја преземат контролата врз Претставничкиот дом.
Според Обама, прашањето треба да стане една од централните теми и за кандидатите кои ќе влезат во претседателската трка во 2028 година. Тој смета дека тие треба конкретно да објаснат како ќе се справат со безбедносните, општествените и економските последици од технологијата.
Особено внимание посветил на можноста вештачката интелигенција да предизвика големи промени на пазарот на трудот.
„Размислував за економските последици на многу конкретен начин и се обидував да разберам што значи ако дојде до губење работни места. Ако се случи голем број луѓе повеќе да не можат да најдат работа со полно работно време затоа што станале вишок, како ќе одговориме на тоа?“, прашал Обама.
Тој посочил дека политичарите мора да имаат план и за заштитата на децата од потенцијалните негативни последици на технологијата.
„Би зборувал за ова и би рекол: ‘Еве го нашиот план за безбедност. Еве го нашиот план како да обезбедиме ова да не ги исквари нашите деца’“, рекол Обама.
Поранешниот претседател нагласил дека не се смета ниту за застапник на неконтролирано забрзување на развојот на вештачката интелигенција, ниту за човек кој предвидува неизбежна катастрофа. Неговиот став е дека технологијата треба да продолжи да се развива, но под правила кои ќе ги ограничат ризиците.
Повикот на Обама доаѓа во период на засилена дебата во САД за брзината со која се развиваат најмоќните системи за вештачка интелигенција и за тоа дали политичките институции заостануваат зад технолошката индустрија.
Во Конгресот сè уште нема сеопфатна федерална регулатива за вештачката интелигенција. Дел од демократите бараат побрзо усвојување заштитни механизми, додека и некои републикански пратеници предлагаат двопартиски мерки.
Администрацијата на претседателот Доналд Трамп, пак, има поинаков пристап и поголем акцент става на забрзаниот развој и американската конкурентност, особено во однос на Кина.
Обама смета дека токму поради брзината со која напредува технологијата, политиката нема многу време за реакција. За него клучното прашање веќе не е дали вештачката интелигенција ќе го промени општеството, туку како државата ќе управува со промените – од безбедноста и влијанието врз децата до можната загуба на голем број работни места.
