Обединетите Арапски Емирати наводно се обиделе да убедат други земји од Персискиот Залив да се приклучат на координиран напад врз Иран по почетокот на американско-израелската кампања против Техеран, но не успеале во тоа, објави денеска „Блумберг“, повикувајќи се на извори запознаени со ситуацијата.
Според информациите, претседателот на ОАЕ, шеикот Мохамед бин Зајед, разговарал со лидерите од регионот, меѓу кои и саудискиот престолонаследник Мохамед бин Салман, залагајќи се за заедничка воена акција против Иран.
Сепак, другите земји од Заливот го одбиле тој предлог.
„Блумберг“ наведува дека ваквите несогласувања можеби ги објаснуваат неодамнешните тензии меѓу ОАЕ и некои заливски држави, вклучително и одлуката на Емиратите минатиот месец да ја напуштат Организацијата на земјите извознички на нафта – ОПЕК.
Во извештајот се наведува и дека Саудиска Арабија во март извела напад врз Иран, но набргу потоа преминала на поддршка на посредничките напори што ги предводи Пакистан.
Катар, според истите извори, разгледувал можен одговор по иранскиот напад врз гасната постројка Рас Лафан, најголемата фабрика за течен природен гас во светот, но подоцна се откажал од одмазда.
Администрацијата на американскиот претседател Доналд Трамп била информирана за настојувањата на ОАЕ да формираат заеднички воен одговор и ја поддржувала можноста Саудиска Арабија и Катар да се приклучат на иницијативата, пишува „Блумберг“.
