Од 1 септември 2026 година повторно ќе биде достапна железничката врска меѓу Зелениково и Скопје, со градски воз кој ќе сообраќа осум пати дневно во двата правца.
Возот од Зелениково ќе застанува на станиците Зелениково Ново, Орешани, Јане Сандански, Драчево и Лисиче, а крајната станица ќе биде Железничката станица Скопје.
Првото поаѓање од Зелениково ќе биде во 6:20 часот, а потоа возови ќе има во 8:30, 12:26, 14:00, 16:25, 18:30, 20:12 и 21:55 часот.
Во обратен правец, од Железничката станица Скопје, првиот воз ќе тргнува во 5:32 часот. Следните поаѓања се во 7:30, 11:40, 13:20, 15:42, 17:45, 19:12 и 20:56 часот.
Патувањето од Зелениково до Скопје ќе трае меѓу 24 и 28 минути, зависно од поаѓањето, додека во обратен правец времетраењето ќе биде од 24 до 26 минути.
Возниот ред ќе важи од 1 септември до 31 декември 2026 година.
Повторното воведување на линијата е особено значајно за жителите на Зелениково, Орешани, Драчево, Лисиче и околните населени места кои секојдневно патуваат кон Скопје.
Практичноста на линијата, сепак, ќе зависи и од тоа колку поаѓањата ќе бидат усогласени со работното време, училиштата и останатиот јавен превоз во главниот град.
Повторното активирање на оваа железничка врска доаѓа во период кога патничкиот железнички сообраќај во земјава е значително намален.
По македонските пруги моментално сообраќаат десет пара патнички возови – по три од Скопје кон Битола и Велес и по два кон Куманово и Гевгелија.
Дел од претходните линии се укинати или привремено суспендирани. Два воза од Скопје кон Велес и еден кон Битола беа укинати поради реконструкцијата на делницата Скопје – Зелениково, а меѓународни возови кон Грција, Србија и Косово во моментов нема.
Возовите од Скопје кон Кичево и Кочани не сообраќаат од мај 2021 година.
Намалениот број линии особено ги погодува патниците од места каде железницата долго време била една од ретките достапни и поевтини опции за патување до работа, училиште, факултет или лекар.
