Изминатава година интензивно се работи на воведување на градскиот воз, кој треба да ги поврзе приградските населби и општините околу Скопје со главниот град, обезбедувајќи побрз и поеколошки начин на превоз, вели заменик-претседателот на Владата и министер за транспорт Александар Николоски.
Тој посочува дека од Зелениково до Скопје со воз се патува околу 24 минути, додека со автомобил патувањето може да трае и до 70 минути.
„Тоа сериозно ќе придонесе за намалување на загадувањето и ќе им овозможи на учениците, студентите и сите оние што работат во Скопје и околните општини навреме да стигнуваат“, вели Николоски.
Градскиот воз во моментов сообраќа преку Зелениково, Ново Зелениково, Орешани, Јане Сандански, Лисиче и Драчево, а се работи и на станица кај Кисела Вода – „11 Октомври“ – бараки. Линијата завршува на Новата железничка станица.
Николоски додава дека се проектираат уште две линии – од Ѓорче Петров до Центар и од Илинден до Центар. Со нив, според него, ќе се заокружи концептот на три линии на градскиот воз како нов вид јавен превоз во Скопје.
