Основното јавно обвинителство за гонење организиран криминал и корупција ја потврди големата утринска акција за која претходно информираше „Скопје1“. Официјалното кодно име на операцијата е „Филтер 2“, а според Обвинителството постои основано сомнение за повеќе кривични дела, меѓу кои криумчарење и царинска измама, со кои е предизвикана штета на државниот буџет од големи размери.
Акцијата се спроведува под раководство на јавен обвинител од Специјализираното одделение за гонење кривични дела сторени од лица со полициски овластувања и припадници на затворската полиција.
На терен постапуваат Царинската управа и Одделот за сузбивање организиран и сериозен криминал при МВР-БЈБ.
„Акцијата е резултат на криминалистичка истрага поради постоење основано сомнение за сторени повеќе кривични дела, меѓу кои Криумчарење и Царинска измама при што е предизвикана штета на државниот буџет од големи размери“, соопшти Обвинителството.
Како што претходно неофицијално објави „Скопје1“, акцијата е насочена кон сомнежи за организиран шверц на големи количини цигари.
Според информациите на „Скопје1“, утрово се приведени 13 лица, а претреси се вршат на повеќе од 20 локации на подрачјето на Гевгелија, Валандово, Струмица, Дојран, Велес и Скопје.
Нашите информации се дека со истрагата се опфатени физички лица и субјекти од шпедитерскиот, транспортниот и увозниот сектор, како и полициски и царински службеници.
Овие детали, вклучително и бројот на приведени и конкретните локации на претресите, засега не се наведени во првичното соопштение на Обвинителството и остануваат неофицијални информации на „Скопје1“.
Од ОЈО ГОКК најавуваат дека јавноста ќе биде дополнително информирана по завршувањето на активностите во рамките на операцијата „Филтер 2“.
