Голема операција под кодно име „Филтер“ е во тек утрово против организирана група осомничена за шверц на големи количини цигари, дознава „Скопје1“ од извори запознаени со акцијата.
Според неофицијалните информации на „Скопје1“, досега се приведени 13 лица, а претреси се вршат на повеќе од 20 локации на подрачјето на Гевгелија, Валандово, Струмица, Дојран, Велес и Скопје.
Акцијата е насочена кон, како што неофицијално дознаваме, сложен систем за организиран шверц на цигари. Меѓу лицата и субјектите опфатени со истрагата има шпедитерски, транспортни и увозни компании, физички лица, но и полициски и царински службеници.
Според информациите со кои располага „Скопје1“, Царинската управа, преку Секторот за контрола и истраги и Одделението за истраги, во координација со Министерството за внатрешни работи, Бирото за јавна безбедност и Обвинителството за гонење организиран криминал и корупција, под раководство на надлежен јавен обвинител, подолг период работела на случајот.
Во рамките на истрагата, според нашите извори, биле откриени повеќе случаи на организиран шверц на големи количини цигари.
Сомнежите се дека преку ваквото постапување било избегнато плаќање давачки во износ од неколку милиони евра.
Акцијата сè уште трае, а на терен се вршат претреси и други дејствија.
„Скопје1“ очекува официјални информации од Царинската управа и останатите надлежни институции во текот на денот, по што ќе бидат познати повеќе детали за операцијата, лицата опфатени со неа и сомненијата за конкретните кривични дела.
Ова не се први апсења во оваа институција изминатиов период.
