Основното јавно обвинителство Гостивар отвори истрага против три лица осомничени за тешки дела против животната средина и природата, поврзани со загадување на водата за пиење во Гостивар.
Осомничените, вршителката на должноста директорка на ЈП „Комуналец“ – Гостивар, техничкиот раководител на Секторот за технички работи и раководителот на Одделението за водовод, канализација и градежни работи, се сомничат дека со свои дејствија ја направиле неупотреблива водата за пиење во системот што ја снабдува Општина Гостивар и дел од околните села.
Според Обвинителството, на 25 јуни тие им наложиле на вработените во претпријатието да постават три потопни пумпи во канал со површинска вода што содржела штетни материи, во близина на преливната комора со вода за пиење, со цел да го тестираат притисокот на водата.
При увид извршен на 16 јули било утврдено дека две од пумпите сè уште биле во употреба и преку црева пренесувале вода со колиформни бактерии од отворениот канал во затворениот систем за водоснабдување. На тој начин дошло до мешање на загадената вода со водата за пиење во главниот водоводен систем.
По наредба на јавен обвинител, Институтот за јавно здравје извршил лабораториски анализи, при што било утврдено високо присуство на колиформни бактерии во примероците од каналот, како и бактериска контаминација во водата од каптираниот извор. Анализите покажале дека водата не била безбедна за употреба и консумирање.
Дополнително, во примерок земен од чешма на улицата „ЈНА“ во Гостивар било утврдено и зголемено присуство на резидуален хлор, над максимално дозволените вредности.
Обвинителството оценува дека постои основано сомнение за сторено кривично дело, имајќи предвид дека последиците од загадувањето не можат лесно да се отстранат.
Тројцата осомничени се лишени од слобода, а јавниот обвинител во текот на утрешниот ден ќе одлучи дали ќе побара определување мерки за нивно обезбедување. Истрагата за целосно расчистување на случајот продолжува.
