Обвинителството пред судот: Груби, Бајрами и членовите на надзорниот одбор заеднички преземале дејствија на штета на „Државна лотарија“

На второто рочиште за случајот со „Државна лотарија“, Обвинителството пред судот го презентира обвинението и дејствијата што им ги става на товар на Артан Груби и останатите обвинети. По читањето на обвинението треба да следува нивното изјаснување за вина.

Обвинителството пред судот детално ги образложува улогите што, според обвинението, ги имале обвинетите во текот на 2023 и 2024 година, секој од позицијата што ја извршувал во Владата, „Државна лотарија“ или нејзиниот Надзорен одбор.

— реклама —

Во обвинението се опфатени поранешниот генерален директор на „Државна лотарија“ Прпарим Бајрами, поранешниот генерален секретар на Владата Методија Димовски, поранешниот прв вицепремиер Артан Груби, како и поранешниот претседател на Надзорниот одбор Скендер Мехмети и членовите Бојан Јанев, Фатмир Рамадановски, Александар Димитриоски и Башким Авди.

Обвинителството тврди дека обвинетите, во рамките на своите различни функции и овластувања, заеднички преземале дејствија на штета на „Државна лотарија“.

— реклама —

Значаен дел од обвинението што се презентира пред судот се однесува на постапката за самостојно приредување електронски игри на среќа и набавката на видеолотариски терминали.

Пред судот се читаат и деловите што се однесуваат на одлуките на органите на „Државна лотарија“, како и на постапките за склучување рамковни договори за јавна набавка на видеолотариски терминали.

— реклама —

Во делот за Груби, Обвинителството се повикува на неговата тогашна функција како прв заменик-претседател на Владата и на неговото претседавање со владина седница на која било разгледувано прашање поврзано со „Државна лотарија“.

На рочиштето се произнесе и адвокатот на „Државна лотарија“, која во предметот се јавува како оштетено правно лице. Тој посочи дека друштвото има побарување, но дека дополнително ќе одлучи на кој начин ќе го остварува.

„Државната лотарија побарува. Во текот на постапката ќе се произнесеме дали ќе го остваруваме во оваа постапка или во граѓанска постапка по завршување на кривичната постапка“, рече адвокатот.

По презентирањето на обвинението пред судот треба да следува изјаснувањето на обвинетите за вина.