Одбраната на Груби со низа приговори на испитувањето на вештакот за набавката во „Државна лотарија“

Бројни приговори од одбраната го одбележаа денешното рочиште за случајот „Државна лотарија“, на кое јавните обвинители ја испитуваа Анита Поповска, лиценциран економски вештак кој го изработил наодот за набавката на видеолотариските терминали (ВЛТ).

Поповска остана во целост на вештиот наод и мислење изработени во јуни 2026 година, со кои ја анализирала постапката за набавка на терминалите за приредување игри на среќа од страна на „Државна лотарија“.

Обвинителството со прашањата се обиде да разјасни делови од вештачењето, особено во врска со мислењето на Министерството за финансии дека нема забелешки на доставената информација за потребата „Државна лотарија“ самостојно да приредува игри на среќа.

— реклама —

Вештакот се обиде да објасни дека Министерството за финансии дава мислења од аспект на буџетските средства, додека „Државна лотарија“ се финансира од сопствени приходи. Сепак, нејзиното излагање беше прекинувано со приговори од адвокатите на обвинетите.

Адвокатот на Груби, Гоце Ристески, оцени дека прашањата излегуваат надвор од наредбата за вештачење и дека со нив се отвораат прашања за кои вештакот не е надлежен да дава мислење.

— реклама —

„Не смееме да дозволиме да се излезе надвор од она што веќе е доставено како доказ, со дополнително и поинакво правно вештачење, под превезот на прашања за разјаснување факти кои се надвор од наредбата за вештачење“, приговараше Ристески.

Обвинителите возвратија дека приговорите треба да се однесуваат на поставените прашања, а не на одговорите на вештото лице, предупредувајќи на можноста за создавање процесен преседан.

Приговори имаше и на прашањата за содржината на планот за јавни набавки и финансискиот план во делот на набавката на терминалите. Адвокатот Ристески повторно оцени дека со тоа се отвораат нови околности и се создава практично ново вештачење.

— реклама —

И адвокатот Владимир Доневски се повика на Законот за игрите на среќа, според кој надзорот над спроведувањето на неговите одредби го врши Министерството за финансии. Тој побара одговорите да се ограничат на економскиот аспект.

Обвинителството и вештакот реагираа на приговорите, при што Поповска посочи дека не може во писмениот наод да ги опфати сите детали и дека токму затоа е повикана во судницата да ги појасни своите заклучоци. Судот ги одби приговорите, по што таа продолжи да одговара на прашањата.

— реклама —

Поповска зборуваше и за управната контрола што Бирото за јавни набавки ја спровело пред набавката, при што не биле констатирани неправилности. Според нејзиното вештачење, набавката на видеолотариските терминали била вредна 9,7 милиони евра.

На едно од следните рочишта треба да сведочи и актуелниот директор на „Државна лотарија“, Александар Климовски.

Обвинетите во предметот се товарат дека во текот на 2023 и 2024 година, со пречекорување на службените овластувања при незаконска јавна набавка и исплата за коцкарски апарати, предизвикале штета на „Државна лотарија“ од околу 596 милиони денари, односно приближно 9,7 милиони евра. Меѓу обвинетите се поранешниот прв вицепремиер Артан Груби и поранешниот директор на „Државна лотарија“, Перпарим Бајрами.