Сведок на судењето за „Државна лотарија“: Бајрами го нарекувал Груби „шефот“

Денеска во Кривичниот суд продолжи судењето за случајот „Државна лотарија“ со сведочење на Андреј Крстевски, советник за имплементација на проекти во АД „Државна лотарија“, во кој обвинети се поранешниот прв вицепремиер Артан Груби, поранешниот директор на претпријатието Перпарим Бајрами и уште шест лица.

Крстевски, кој бил член на Управниот и Надзорниот одбор, а извесен период и заменик-директор, сведочеше за начинот на донесување одлуки во претпријатието и постапката за набавка на ВЛТ-терминалите.

— реклама —

Тој посочи дека идејата за набавката лично му ја претставил Перпарим Бајрами во неговиот кабинет, додавајќи дека сметал оти членовите на Управниот одбор требало да се изјаснат за предлогот. За самата постапка, како што рече, дознал дури по нејзиното завршување, од лица кои биле членови на комисиите задолжени за нејзино спроведување.

На прашањето каде се наоѓаат терминалите, Крстевски одговори дека, според неговите сознанија, тие не биле ставени во функција, туку биле складирани во магацин на претпријатието, додека се чекале потребните решенија.

— реклама —

Сведокот зборуваше и за односите меѓу Бајрами и Груби, наведувајќи дека тие биле во пријателски односи, доаѓале од иста политичка партија и присуствувале на партиски собири. Според неговото сведочење, Бајрами на Груби му се обраќал со „шефот“.

— реклама —

Во вкрстеното испрашување, Крстевски потврди дека членовите на Управниот одбор при донесувањето одлуки се потпирале на мислењата и насоките од правната и финансиската служба. Потврдно одговори и на прашањето дали поранешната директорка Катица Николова Прнакова имала блиски односи со „Казино Австрија“.

По рочиштето, адвокатот на Бајрами, Еленко Миланов, изјави дека за набавката на ВЛТ-терминалите постоеле одлука на Надзорниот одбор и заклучок на Владата, кои, според него, се повисоки органи од Управниот одбор.

Миланов посочи дека терминалите биле предвидени во финансискиот план и планот за јавни набавки и дека сè уште се во сопственост на „Државна лотарија“. Тој оцени дека нема пречка тие да бидат пуштени во употреба, отстапени или продадени на правни лица со соодветни лиценци за приредување игри на среќа.

Според адвокатот, не може да се говори за настаната штета, а вредноста на апаратите во меѓувреме, како што тврди, се зголемила за околу 40 до 50 отсто.