Сведокот го смени исказот во случајот „Државна лотарија“, Обвинителството проверува дали имало притисоци

Обвинителството проверува дали некој влијаел врз сведокот кој го промени исказот во судскиот процес за злоупотребите во „Лотарија“, во кој се обвинети поранешниот вицепремиер Артан Груби, ексдиректорот Препарим Бајрами и уште лица.

— реклама —

Станува збор за првиот сведок предложен од Обвинителството, кој на судењето го сменил претходно дадениот исказ и сведочел во корист на одбраната. Обвинителите Даниел Коцев и Александар Давчевски велат дека предметот не ја губи својата тежина, бидејќи обвинението се темели на материјални докази.

Обвинителството истовремено проверува дали имало влијание врз сведокот, против кого сè уште се води и предистражна постапка.

— реклама —

„Од нему познати причини, реши да го промени исказот што претходно го дал пред Обвинителството. Немаме сознанија дека било влијаено врз него на каков било начин. Тој дел го истражуваме и во моментов преземаме одредени дејства во таа насока. Не можам да откријам ништо повеќе“, изјави обвинителот Даниел Коцев.

— реклама —

Тој појасни дека против сведокот сè уште се води предистражна постапка, бидејќи е опфатен во пријавата на МВР и во таа постапка имал својство на осомничен. Пријавата се однесува на повеќе постапки, меѓу кои и набавката на ВЛТ-апаратите.

Судското рочиште беше одложено поради отсуство на повиканиот сведок на Обвинителството. На претходното рочиште сведочеше раководител на сектор во Државна лотарија, кој бил член на Комисијата за набавка на ВЛТ-апаратите. Тој потврдил дека апаратите сè уште се наоѓаат во магацините на претпријатието и не се користат.

Во предметот, Препарим Бајрами, Артан Груби и други вработени во Државна лотарија се обвинети за злоупотреба на службената положба, со која, според обвинението, била предизвикана штета од околу 9,7 милиони евра при набавката на покер-апаратите.