Од 1 декември нови правила за боледување: Матичниот лекар ќе одобрува само пет дена, за повеќе ќе бидат потребни дополнителни испитувања или специјалистички прегледи

Од 1 декември започнува примената на нови правила за одобрување боледување, со кои се скратува периодот во кој матичниот лекар може да одобри отсуство без дополнителни дијагностички критериуми. Наместо досегашните седум, тој период ќе изнесува пет дена, а за продолжување ќе бидат потребни дополнителни испитувања или специјалистички прегледи, во зависност од здравствената состојба на пациентот.

— реклама —

Од Фондот за здравствено осигурување појаснуваат дека оваа промена не значи дека пациентите задолжително треба да се вратат на работа по петтиот ден, ниту дека им се одзема правото на боледување. Матичните лекари и натаму ќе можат да одобруваат отсуство до 15 дена, додека за подолг период ќе одлучува лекарска комисија. Кога медицинската состојба го оправдува тоа, ќе може да се издаде и приоритетен упат за побрз специјалистички преглед.

— реклама —

Дел од лекарите, сепак, бараат дополнителни објаснувања за примената на правилникот, особено во случаи кога пациентите не можат навреме да добијат термин за специјалистички преглед. Тие сметаат дека критериумите за одредени дијагнози треба повторно да се разгледаат. За 20 ноември е најавена отворена дебата меѓу Фондот и претставниците на лекарите.

Со новиот правилник се заоструваат и условите за подолготрајно боледување. За отсуство подолго од 60 дена, по правило, ќе биде потребно конзилијарно мислење од тројца специјалисти. Предвидени се исклучоци за одредени тешки заболувања, а кај хроничните пациенти ќе можат да се земат предвид и претходните дијагностички наоди, доколку се соодветни.

— реклама —

Правилникот ги уредува и електронското издавање извештаи, постапката за повторно отворање боледување, како и правото на приговор на лекарската оценка.

— реклама —

Од Фондот најавуваат и работилници на 19 и 20 ноември, наменети за дополнително запознавање на матичните лекари со новите критериуми.