Боледувањето може да трае и повеќе од пет дена, но по петтиот ден ќе важат дополнителни медицински критериуми

Наскоро треба да стапат во сила измените на правилникот за утврдување и продолжување на боледувањата, откако министерот за здравство Сашо Клековски ја потпишал согласноста за нивното донесување. Измените се очекува да бидат објавени во „Службен весник“.

— реклама —

Клековски посочи дека промените не значат само зајакнување на контролите и спречување можни злоупотреби, туку содржат и олеснувања за одредени категории пациенти. Измените се подготвени врз основа на компаративни анализи.

Една од главните промени е намалувањето од седум на пет дена на периодот во кој матичниот лекар може да отвори боледување без дополнителни критериуми. Според Клековски, ова не значи скратување на правото на боледување, туку промена во начинот на кој се контролира неговото продолжување.

— реклама —

Тој објасни дека бројот на боледувања што се издаваат по телефон е зголемен, поради што пет дена се сметаат за доволен период за ваков тип боледување.

— реклама —

Од Фондот за здравствено осигурување нагласуваат дека петтиот ден не е максималното времетраење на боледувањето. Директорот на ФЗО, Златко Перински, посочи дека доколку постои медицинска потреба, боледувањето може да трае 10, 20, 30 дена или подолго.

По истекот на петтиот ден, доколку боледувањето продолжува, ќе се применуваат дополнителни медицински критериуми. Матичниот лекар и понатаму останува надлежен да ја утврдува привремената спреченост за работа до 15 дена, додека за боледувања подолги од 15 дена одлучува лекарската комисија на Фондот.

— реклама —

Од ФЗО очекуваат измените да придонесат за намалување на можностите за злоупотреба на боледувањата, без да се ограничува правото на пациентите да користат боледување кога за тоа постои медицинска потреба.