Од 1 октомври почнува пријавувањето за продолжување на студентските стипендии

Министерството за образование и наука ги информира студентите кои во изминатите академски години оствариле право на студентска стипендија дека од 1 до 30 октомври 2026 година ќе можат да аплицираат за продолжување на правото, доколку ги исполнуваат условите предвидени со договорот.

— реклама —

За продолжување на стипендијата, студентите треба електронски да достават потврда за запишан нареден семестар, односно година на студирање, уверение со положени испити, издадено од факултетот, како и уверение за предвидени и положени испити (УППИ).

— реклама —

УППИ образецот треба да биде пополнет и заверен од факултетот и да го содржи успехот од претходните години. Со него студентот докажува дека ги исполнува условите за положениот процент од предвидените испити, односно 80 или 90 проценти, во зависност од видот на стипендијата, како и условот за одржување на потребниот просечен успех.

Потребно е да се достави и индексот, од првиот запишан семестар до последниот заверен семестар.

— реклама —

Документите се прикачуваат електронски преку платформата за е-услуги на МОН.

За дополнителни информации и прашања, студентите можат да се обратат на електронската пошта studentskii.stipendii@mon.gov.mk.