Црна Гора, една од омилените летни дестинации за македонските туристи, ја отвора новата туристичка сезона со речиси непроменети цени на лежалките, но и со огромни разлики меѓу најевтините и најлуксузните плажи.
Според црногорските медиуми, цените на сет лежалки со чадор во најголем дел остануваат на нивото од минатата година. Во Улцињ, кој важи за едно од најприфатливите места за одмор, туристите ќе треба да издвојат од 12 до 20 евра, во зависност од плажата и позицијата на лежалките.
Слични цени има и во Бар, Сутоморе, Чањ и Буљарица, каде што комплетот со две лежалки и чадор чини меѓу 15 и 20 евра.
Сепак, како што се движите кон Будванската ривиера, цените значително растат. Во Каменово, Будва, Јаз и Рафаиловиќи, сет лежалки најчесто започнува од 25 евра, а слична е состојбата и во Бококоторскиот Залив.
Апсолутен рекордер ова лето е Кралската плажа во Милочер, во близина на Свети Стефан, каде што за користење на лежалки и чадор туристите ќе треба да платат дури 200 евра дневно.
Добрата вест за посетителите е што, согласно прописите во Црна Гора, 30 проценти од капацитетот на секоја плажа под закуп мора да остане слободен. Тоа значи дека туристите имаат право бесплатно да престојуваат на плажите со сопствен чадор и лежалки.
Од Туристичката организација на Црна Гора посочуваат дека токму разновидната понуда – од плажи достапни за секој буџет до ексклузивни локации за туристи со подлабок џеб – е нивниот главен адут во конкуренцијата со Хрватска и Албанија во претстојната летна сезона.
Покрај цените, традиционални предизвици и ова лето остануваат сообраќајниот метеж, недостигот на паркинг места и недостигот од сезонска работна сила на црногорското приморје.
