Од 15 ноември задолжителна зимска опрема за возачите, казната за прекршителите е 45 евра

Со приближувањето на зимскиот период, возачите треба навреме да ги проверат гумите и дополнителната опрема во своите возила. Од 15 ноември 2026 година започнува законската обврска за задолжително поседување зимска опрема, а за непочитување на прописите е предвидена глоба од 45 евра во денарска противвредност и можност за запишување 25 негативни бодови.

— реклама —

Правилата важат за моторните возила и мобилните машини, при што задолжителната опрема се определува според најголемата дозволена маса на возилото и видот на погонот.

— реклама —

Кај возилата со најголема дозволена маса до 3.500 килограми, потребни се зимски пневматици на сите тркала со длабочина на шарата од најмалку четири милиметри. Наместо нив, може да се користат и летни пневматици со иста длабочина на шарата, но само доколку во возилото има и синџири за снег што одговараат на големината на погонските тркала.

За возилата со погон на сите четири тркала важат посебни услови. Зимските пневматици треба да бидат поставени на сите тркала и да имаат шара длабока најмалку шест милиметри. Доколку возилото има летни пневматици со минимална длабочина на шарата од четири милиметри, мора да располага и со синџири за снег. Кај возилата со постојан погон на сите тркала, синџирите треба да одговараат на задната осовина, а кај возилата со преклопив погон – на погонските тркала.

— реклама —

За моторните возила со најголема дозволена маса над 3.500 килограми, задолжителни се зимски пневматици на сите тркала со шара од најмалку шест милиметри. Како алтернатива, се дозволени летни пневматици со шара од најмалку четири милиметри, под услов возилото да има и соодветни синџири за снег.

Автобусите и товарните возила чија конструкција не овозможува поставување синџири на тркалата мора да имаат зимски пневматици на погонските тркала и прирачен алат.