Возачите мора да имаат зимска опрема од утре – казната е 45 евра

Од 15 ноември почнува обврската за задолжително поседување зимска опрема во возилата што учествуваат во јавниот сообраќај. Возачите кои нема да ја почитуваат законската обврска ризикуваат парична казна од 45 евра.

— реклама —

Според Министерството за внатрешни работи, за патничките возила до 3.500 килограми зимската опрема подразбира зимски пневматици на сите четири тркала со најмалку четири милиметри длабочина на шарата. Како алтернатива може да се користат летни пневматици со најмалку четири милиметри шара, доколку возилото има синџири за снег со соодветна големина за погонските тркала.

— реклама —

За возилата со погон на четири тркала важат посебни услови: зимските пневматици треба да имаат шара од најмалку шест милиметри, додека кај летните пневматици минималната длабочина е четири милиметри, со задолжително поседување синџири за снег.

Кај возилата потешки од 3.500 килограми се потребни зимски пневматици на погонските тркала со најмалку шест милиметри шара или летни пневматици со најмалку четири милиметри, доколку имаат соодветни синџири за снег или други помагала. Автобусите и товарните возила што поради технички причини не можат да постават синџири мора да имаат зимски пневматици и лопата.

— реклама —

Од МВР појаснуваат дека зимски пневматици се оние со ознаки „MS“, „M+S“, „M & S“ или симбол на снегулка на стилизирана планина. Воедно, забранета е употреба на пневматици со клинци.

— реклама —

„Апелираме до возачите да се придржуваат кон законската обврска за поседување зимска опрема бидејќи така овозможуваме непречено и безбедно одвивање на сообраќајот на патиштата во зимски услови“, наведуваат од МВР.