Од 60 на 30 метри: Државното знаме кај „Континентал“ ќе се вее на двојно понизок јарбол – за најкусо време се враќа и знамето над МРТВ

Граѓани реагираат дека на повеќе локации во Скопје сè уште ги нема државните знамиња по силното невреме кое оштети дел од јарболите. Меѓу локациите за кои се поставуваат прашања се просторот кај хотелот „Континентал“, во близина на трговскиот центар „Ист Гејт“, како и објектот на Македонската радио-телевизија. Скопје1 побара одговори од Службата за општи и заеднички работи (СОЗР), од каде што потврдуваат дека се подготвуваат активности за обновување на јарболите, но со значајна промена кај „Континентал“.

Наместо претходниот јарбол висок 60 метри, на истата локација ќе биде поставен нов со висина до 30 метри, односно најмногу половина од претходната висина.

— реклама —

Од СОЗР за Скопје1 објаснуваат дека за поставувањето најпрво мора да се изработи основен проект со ревизија, согласно со Законот за градење. Дури потоа ќе следуваат постапката за набавка и изведбата на новата конструкција.

Причината за намалувањето на висината, според институцијата, е пред сè безбедноста на граѓаните. Јарболот се наоѓа на фреквентна раскрсница, во непосредна близина на хотел и трговски центар, каде што евентуално оштетување или уривање на висока конструкција може да претставува сериозен ризик.

— реклама —

Од СОЗР посочуваат дека влијанието на ветерот се зголемува со висината на конструкцијата, поради што понискиот јарбол ќе овозможи намалување на оптоварувањата и ризиците при екстремни временски услови.

Како дополнителни причини ги наведуваат полесното одржување и економичноста. Јарбол висок до 30 метри ќе овозможи поедноставна контрола на конструктивните споеви и анкерните врски, како и побезбедно менување на знамето и сервисирање на осветлувањето.

— реклама —

Помалата конструкција, според институцијата, ќе бара и помалку материјали, помал темел и поедноставна монтажа, со што се очекува да се намалат трошоците за реализација.

Во однос на причините за уривањето на претходниот јарбол, од СОЗР наведуваат дека тоа се случило како последица на силното невреме кое го зафати Скопје, но нагласуваат дека причините се предмет на стручна анализа.

— реклама —

Одговор добивме и за јарболот кај Македонската радио-телевизија, висок осум метри, кој исто така бил оштетен при невремето.

Од СОЗР најавуваат дека тој ќе биде поправен по кратка постапка, по можност преку еднократна набавка, без потреба од целосна замена како кај „Континентал“.