Знамето на Македонија повторно беше претставено со погрешен број краци на прослава на државната независност. Пет години откако ВМРО-ДПМНЕ остро го осуди сонцето со 12 наместо со осум краци како „сквернавење на државното знаме“, слична грешка се појави и на почетокот на прославата за 35 години независна Македонија.
На музичко-сценскиот спектакл „Силно светнал ден“, одржан на 9 август на стадионот „Билјанини извори“ во Охрид, на сценографијата и на видеобимовите беше прикажан симбол што јасно потсетува на македонското знаме, но сонцето имаше повеќе краци од пропишаните осум. Тоа можеше да се забележи и во директниот пренос на МРТ и на Јутјуб.
Официјалното македонско знаме има жолто сонце поставено на црвена основа, со осум краци што се шират од средината кон рабовите. Токму бројот на краците е очигледната разлика меѓу државното знаме и визуелното решение употребено во Охрид.
Но ова не е првпат прослава на независноста да биде проследена со спор околу погрешно претставено сонце.
Во јули 2021 година, при одбележувањето на 30-годишнината од независноста, тогашната влада предводена од СДСМ претстави лого во кое сонцето визуелно оставаше впечаток дека има 12 наместо осум краци. Реакциите во јавноста беа насочени и кон испишувањето „Северна Македонија“ без зборот „Република“, како и кон впечатокот дека се одбележуваат 30 години од името Северна Македонија, иако тоа беше воведено во 2018 година, а не 30 години независност на државата.
Тогашната опозициска ВМРО-ДПМНЕ го оцени решението како сквернавење на знамето и побара негово итно повлекување, како и распишување нов конкурс со прецизни услови.
„Непостоењето на терминот ‘република’ како одредница за општественото уредување и пренебрегнувањето на фактот дека на 8 септември 1991 година македонскиот народ гласаше за суверена и независна држава Република Македонија го прави понуденото решение целосно неприфатливо“, соопшти ВМРО-ДПМНЕ во јули 2021 година.
Од партијата тогаш тврдеа дека изборот на логото ги доведува во прашање општественото уредување и историскиот континуитет на македонската државност, а Владата предводена од СДСМ ја обвинија дека им нанесува штета на македонскиот идентитет и на државните симболи.
Тогашната власт одговори дека на логото не било прикажано државното знаме, туку стилизирано сонце, различно и според обликот и според бројот на краците. Од Владата порачаа дека употребата на државното знаме е уредена со закон.
На спорното лого реагираше и историчарката на уметност Соња Абаџиева, која оцени дека тоа содржи три „фатални грешки“ и треба да биде отфрлено.
„Елементарни непознавања, за ликовниот аспект не сакам ниту да зборувам. Голема дезинформација, зарем не гледате дека е пола знаме, каде е Републиката? Знаат ли да сметаат, 30 години ли сме Северна?“, изјави Абаџиева во 2021 година за „Сакам да кажам“.
Пет години подоцна, политичките улоги се сменети, но грешката со бројот на краците повторно се најде на прослава на независноста. Разликата е во тоа што во 2021 година спорниот симбол беше дел од официјалното лого, додека во Охрид се појави на делови од сценографијата и на видеобимовите. Сега СДСМ бара одговорност.
„На официјална државна прослава по повод 35 години независност, платена со милиони евра народни пари, Владата на премиерот Христијан Мицкоски го утна македонското знаме. Срамота. Не го сменија името, но успеаја да го сменат знамето. Нова верзија на знамето за држава со политика, како што вели Мицкоски ‘Нема воз за ЕУ, има само вагон што сами си го клатиме’“, реагираа социјалдемократите.
Охридскиот спектакл беше првиот од серијата настани по повод 35 години независност. На стадионот настапија Игор Џамбазов и повеќе од 30 македонски изведувачи, а преку музика, театар и поезија беше претставена приказната за македонската држава, нејзината историја, успеси, загуби и генерации.
Карванот „Силно светнал ден“ треба да опфати 11 македонски градови, а завршницата е најавена за 8 септември со концерт на Дејвид Гета на Градскиот стадион во Скопје. На 1 септември на плоштадот „Македонија“ треба да настапи и шпанскиот тенор Хосе Карерас. Владата сè уште не ја објавила вкупната цена на програмата за одбележување на јубилејот.
