Од Белата куќа дошла наредба за ограничување на „Старлинк“ во Украина

Од Белата куќа наводно дошла наредба за ограничување на сателитскиот систем „Старшилд“, кој Украина го користи за комуникација на бојното поле и за операции со беспилотни летала, објави „Ројтерс“, повикувајќи се на двајца американски функционери и еден западен претставник запознаени со случајот.

Според изворите, раководството на американското Министерство за одбрана добило порака дека треба да се забави работата на услугата „Старшилд“, развиена од компанијата „СпејсЕкс“. Сепак, соговорниците на агенцијата не откриле кој во Белата куќа ја донел одлуката, ниту кој бил задолжен за нејзиното спроведување.

— реклама —

Пентагон е најголемиот клиент на „Старшилд“, воената верзија на сателитскиот систем „Старлинк“.

Украински функционери оваа недела соопштија дека приемниците „Старлинк“ со воени спецификации престанале да функционираат во Украина кога биле поставени на објекти што се движат со голема брзина. Тоа предизвикало проблеми во работењето на украинските беспилотни летала.

— реклама —

Од украинското Министерство за одбрана соопштиле дека приемниците сега функционираат и при движење, но само при брзини до 160 километри на час.

— реклама —

Висок американски функционер изјавил дека Доналд Трамп никогаш не побарал ограничување на работата на „Старшилд“. Белата куќа, сепак, не одговорила на прашањата дали такво барање можеби упатиле други претставници на администрацијата.

„Старшилд“ е развиен од „СпејсЕкс“ специјално за американската влада и за клиенти од областа на националната безбедност, особено Министерството за одбрана на САД.

Извршниот директор на „СпејсЕкс“, Илон Маск, изјавил дека системите „Старшилд“ се во сопственост и под контрола на американската влада. Според него, американската војска или претседателот одлучуваат за евентуалните ограничувања на брзината и начинот на користење на системот.

Украински претставници предупредиле дека ограничувањата ги отежнале нападите врз руските сили и логистичките операции на окупираните територии. Истовремено, тие го забавиле и работењето на украинските дронови наменети за соборување руски беспилотни летала.