Пет собраниски комисии денеска ќе одржат седници на кои ќе се разгледуваат предлог-закони, национални стратегии, извештаи за работата на правосудните институции, како и предлози за избор и именување функционери.
Комисијата за одбрана и безбедност ќе ја одржи 49. седница, со една точка на дневен ред – Предлог-националната стратегија за безбедност на сообраќајот на патиштата за периодот 2026-2030 година.
На 190. седница ќе заседава и Законодавно-правната комисија. Покрај стратегијата за безбедност на сообраќајот, пред членовите ќе се најдат повеќе предлог-закони за ратификација на меѓународни договори и протоколи.
Меѓу нив се предлог-законите за ратификација на Конвенцијата за Бирото на Европската конференција за цивилно воздухопловство, Протоколот со Литванија за спроведување на Спогодбата за преземање лица кои престојуваат без дозвола, како и договорите со Словенија и Португалија за соработка во областа на одбраната.
На дневен ред на оваа комисија е и Предлог-законот за пријавување и проверка на странски директни инвестиции, во прво читање, како и Националната стратегија за спречување на корупцијата и судирот на интереси за периодот 2026-2030 година.
Седница ќе одржи и Комисијата за политички систем и односи меѓу заедниците. На 81. седница ќе се разгледуваат повеќе извештаи поврзани со работата на правосудните институции во текот на 2025 година.
Пред членовите ќе бидат Извештајот на Судскиот буџетски совет за реализацијата на Судскиот буџет за 2025 година, Годишниот извештај за работата на Судскиот совет, Годишниот извештај за работата на Советот на јавните обвинители, како и Годишниот извештај за работата на јавните обвинителства за 2025 година.
Закажани се и две седници на Комисијата за прашања на изборите и именувањата. На нив ќе се разгледуваат предлози поврзани со избор и именување членови на повеќе државни тела.
Меѓу останатото, ќе се утврдува предлог-листа за избор на член на Државната комисија за спречување на корупцијата, како и предлог-одлука за избор на член на Државниот совет за превенција на детското престапништво и правда за деца.
На дневен ред е и утврдување предлог-одлука за именување член на Комисијата за заштита на конкуренцијата.
Пратениците ќе разгледуваат и предлог-одлуки за промени во составот на собраниските комисии и пратеничките групи за соработка со парламентите на други држави.
Пред Комисијата ќе се најдат и предлози за разрешување и именување претседатели и членови на одборите за доделување на државните награди „Мајка Тереза“, „22 Ноември“ и „Св. Климент Охридски“.
