Доколку не постоеше жестокото ривалство меѓу OpenAI и Anthropic, експлозијата на генеративната вештачка интелигенција веројатно немаше да се случи со вакво темпо.
Според извештај на „Ројтерс“, токму информацијата дека Anthropic развива сопствен АИ-четбот го натерала извршниот директор на OpenAI, Сем Алтман, во ноември 2022 година да нареди забрзано лансирање на конкурентен производ. Само две недели подоцна беше претставен ChatGPT – алатка која предизвика глобална технолошка револуција.
Денес ривалството меѓу двете компании се префрла на Волстрит. OpenAI и Anthropic се натпреваруваат која прва ќе излезе на берза, во обид да ја дефинира вредноста на индустријата за вештачка интелигенција и да го наметне својот лидер како главен авторитет во секторот.
Според извори на „Ројтерс“, OpenAI им соопштила на дел од инвеститорите дека размислува за иницијална јавна понуда уште во септември. Сепак, Anthropic ја изненади конкуренцијата и на 1 јуни доверливо ги поднесе документите до американските регулатори. OpenAI го следеше истиот чекор една недела подоцна.
Во центарот на ривалството се наоѓаат Сем Алтман и Дарио Амодеи – поранешен истражувач во OpenAI и еден од клучните луѓе во развојот на технологијата што подоцна ќе стане основа за ChatGPT. Амодеи ја напушти компанијата во 2020 година и ја основа Anthropic, најавувајќи дека безбедноста на вештачката интелигенција ќе биде главен приоритет.
Конкуренцијата одамна не е само технолошка. Според извештајот, OpenAI и Anthropic се судираат и околу начинот на прикажување на финансиските резултати. Во OpenAI сметаат дека Anthropic ги прикажува приходите повисоки отколку што реално се, бидејќи во извештаите ги вклучува и средствата кои подоцна им ги префрла на партнери како Amazon и Google.
Anthropic ги отфрла ваквите тврдења и наведува дека ги следи стандардните сметководствени практики.
Тензиите се чувствуваат и внатре во компаниите. Според „Ројтерс“, Алтман неодамна влегол во несогласувања со финансискиот директор Сара Фрајер околу тоа дали OpenAI е подготвена за брзо излегување на берза.
Ривалството има и лична димензија. Односите дополнително се влошиле по краткотрајното отстранување на Алтман од челната позиција во OpenAI во 2023 година, кога накратко била разгледувана можност Anthropic и OpenAI да се обединат под водство на Амодеи.
Во февруари годинава Алтман јавно ги критикуваше рекламите на Anthropic за време на Супербоул, а Амодеи возврати со обвинувања дека OpenAI ги користи своите врски со американските институции за да стекне предност.
Колку е длабока нетрпеливоста покажува и момент од Самитот за вештачка интелигенција во Индија, кога индискиот премиер Нарендра Моди ги повика присутните технолошки лидери симболично да се фатат за раце. Алтман и Амодеи, кои стоеле еден до друг, одбиле да го сторат тоа.
„Меѓу овие луѓе се води целосна војна“, вели Анастасиос Ангелопулос, извршен директор на компанијата Arena, која се занимава со анализа и оценување на системи за вештачка интелигенција.
Според него, секое ново лансирање на производ од една компанија веднаш предизвикува реакција од другата, а токму оваа конкуренција е една од главните причини што развојот на вештачката интелигенција денес се одвива со невидено темпо.
