Одбележан Светскиот ден на учителите: Доделени признанија на 13 најдобри наставници

По повод 5 Октомври – Светскиот ден на учителите, Министерството за образование и наука и Сојузот на просветни работници доделија признанија на 13 најдобри наставници и просветни работници од предучилишното, основното и средното образование за учебната 2025/2026 година.

Признанијата ги доделија министерката за образование и наука проф. д-р Весна Јаневска и претседателката на Сојузот на просветни работници, Жаклина Ристовска.

— реклама —

Јаневска им го честиташе празникот на наставниците и им се заблагодари за знаењето, трудот, трпението и посветеноста што ги вложуваат во образованието и развојот на младите.

Таа истакна дека меѓу бројните квалитетни наставници, наградените се издвоиле со резултатите, признанијата, наградите и посветената работа во текот на изминатата учебна година. Според неа, признанијата треба да бидат поттик за наставниците да продолжат со ист ентузијазам и своите знаења и искуства да ги споделуваат со колегите.

Министерката посочи дека во изминатите две години платите во училиштата се зголемени за над 20 проценти, додека во високото образование зголемувањето изнесува 14 проценти. Над 300 наставници и стручни соработници ги искористиле можностите за кариерно напредување и се унапредени во звања ментор или советник.

— реклама —

Дополнително, преку обуки на Бирото за развој на образованието и други партнерски институции и организации се овозможува континуиран професионален развој на наставниот кадар. Во подобрување на условите за настава и работа се вложени над 70 милиони евра, а обезбедени се и нов електронски дневник, дигитални алатки и помагала и подобрена дигитална инфраструктура.

„Без разлика на инфраструктурата, технологијата или инвестициите, најважниот дел од секое училиште останува – наставникот“, порача Јаневска, повикувајќи ги просветните работници да останат посветени и да бидат двигатели на образованието, како и партнери на Министерството, родителите и учениците.

— реклама —

За најдобар просветен работник во предучилишното образование е избрана Клементина Петрушевска, воспитувач во детската градинка „Весели Цветови“ во Кисела Вода.

Во одделенска настава во основното образование признанија добија Соња Трифуновска од ОУ „Гоце Делчев“ – Тетово, Виолета Поповска од ОУ „Вера Јоциќ“ – Гази Баба, Габриела Мерџаноска од ОУ „Гоце Делчев“ – Гостивар, Ксенија Николова од ОУ „Гоце Делчев“ – Босилово и Весна Тодоровска-Унковска од ОУ „Партенија Зографски“ – Кисела Вода.

Во предметна настава се наградени Томе Китановски од ОУ „Гоце Делчев“ – Василево, Бојанка Џипунова-Ташова од ОУ „Васил Главинов“ – Велес, Вера Зороска од ОУ „Христо Узунов“ – Охрид, Оливера Шиклеска-Грозданова од ОУ „Ѓорѓи Сугарев“ – Битола и Благица Чатлеска од ОУ „Гоце Делчев“ – Прилеп.

Во средното образование признанието за најдобар наставник го доби Никола Делевски од Регионалниот центар за стручно образование и обука „Никола Карев“ – Струмица.

Постхумно признание му беше доделено на Слаѓан Станковиќ-Битрак, кој беше дел од наставниот кадар во СОУ „Наце Буѓони“ – Куманово и „Математичко-информатичка гимназија“ во Скопје.