Здружението на граѓани „16-ти Март 2025“ реагира на текот на денешното судско рочиште, оценувајќи дека суштинските прашања во текот на вкрстеното испрашување на вештаците останале во втор план.
Од здружението велат дека наместо јасни и прецизни прашања со кои би се провериле или оспориле наодите од вештачењата, на рочиштето биле поставувани долги серии прашања, со повторување на веќе изнесени наоди и враќање на претходно разгледани теми.
„Вкрстеното испрашување треба да служи за проверка на доказите и утврдување на фактите, а не за проверка колку долго можат судот, вештаците и родителите да издржат бескрајно повторување на прашања без суштина“, наведуваат од здружението.
Оттаму посочуваат дека одбраната има право да ја брани својата позиција, но доколку има забелешки на вештачењата, тие треба да бидат оспорени со факти, документи, стручни аргументи и конкретни прашања.
„Но ако нема што суштински да се оспори, одолжувањето на рочиштето нема магично да создаде аргументи“, се наведува во објавата.
Здружението нагласува дека зад судскиот процес не стојат само документи и вештачења, туку и семејствата на 63-те лица кои ги загубија животите и кои, како што велат, секојдневно ги живеат последиците.
„Фактите се побиваат со факти. Вештачењето – со аргументи. А времето, очигледно, со прашања без крај“, порачуваат од „16-ти Март 2025“.
