Вишиот суд во Подгорица одреди привремено одземање на возилото „Мерцедес Г500“ во сопственост на водачот на кавачкиот клан, Радоје Звицер, поради сомнение дека возилото било стекнато со извршување повеќе кривични дела.
„Судијата за истрага на Вишиот суд во Подгорица, на предлог на Специјалното државно обвинителство, определи привремена мерка за обезбедување, односно забрана за располагање и користење на подвижен имот, специјално (блиндирано) патничко возило „Мерцедес Г500“ на обвинетиот Р. З., бидејќи постои основано сомнение дека обвинетиот го стекнал со извршување кривични дела создавање криминална организација, неовластено производство, поседување и ставање во промет наркотични дроги и перење пари“, соопштено е од судот.
Жалбата против судското решение не го одложува неговото извршување, а забраната за располагање и користење на возилото е евидентирана во соодветните регистри, пренесува РТЦГ.
Црногорското Министерство за внатрешни работи понуди парична награда од 500.000 евра за информации што би можеле да помогнат во апсењето на 42-годишниот Звицер.
По Звицер е распишана меѓународна потерница поради основано сомнение дека сторил повеќе кривични дела, од убиства и трговија со наркотични дроги до недозволено поседување оружје и експлозивни материјали, како и перење пари.
Звицер со години е означуван како еден од водачите на кавачкиот криминален клан и е еден од најбараните бегалци од Црна Гора. Во мај 2020 година беше тешко ранет во обид за атентат во Киев, а црногорското обвинителство го поврзува со низа тешки кривични дела и со дејствување на организирани криминални групи.
Во јули годинава, Вишиот суд во Подгорица во првостепена постапка го осуди во отсуство на 40 години затвор поради создавање криминална организација и други кривични дела.
Со години трае војната меѓу кавачкиот и шкаљарскиот клан, кои ги добиле имињата по которските населби од кои потекнуваат нивните водачи. Се започнало во 2014 година, по исчезнувањето на околу 200 килограми кокаин во шпанска Валенсија, и прераснало во една од најкрвавите пресметки меѓу криминалните групи од просторот на поранешна Југославија.
Во повеќе од десет години конфликт биле убиени повеќе од 60 луѓе, а ликвидациите, освен во Црна Гора и Србија, се случувале и во други европски држави. Еден од најтешките удари врз шкаљарскиот клан беше убиството на неговиот водач Јован Вукотиќ во Истанбул во 2022 година.
