Исхраната е еден од најважните фактори врз кои луѓето можат да влијаат кога станува збор за намалување на ризикот од развој на рак, предупредуваат онколозите. Според нив, одредени навики во исхраната, особено оние што секојдневно се повторуваат, можат да придонесат за зголемување на ризикот од појава на болеста.
Лекарите советуваат денот да не започнува со високо преработени производи богати со шеќер, како што се засладени житни снегулки, кроасани, слатки пецива и слични производи.
Според онкологот д-р Кетан Танки, прекумерниот внес на калории и рафинирани јаглехидрати придонесува за дебелина, а прекумерната телесна тежина е поврзана со поголем ризик од повеќе видови рак.
Онкологот д-р Весли Талкот посочува дека исхраната богата со преработени производи е еден од главните фактори што придонесуваат за зголемување на телесната тежина.
Експертите објаснуваат дека ваквиот појадок може брзо да го зголеми нивото на шеќер во крвта и инсулинот, без притоа да обезбеди подолго чувство на ситост. Дополнително, преработената храна може да придонесе за зголемено ниво на воспалителни процеси во организмот, кои се поврзуваат со развојот на различни заболувања.
„Ако вашиот појадок повеќе наликува на десерт, тогаш не го подготвува организмот на соодветен начин за остатокот од денот“, предупредува д-р Трејси Крејн.
Иако не постои единствен режим на исхрана што може целосно да спречи појава на рак, лекарите препорачуваат исхрана богата со овошје, зеленчук, интегрални житарки, немасни извори на протеини и млечни производи со намалена масленост.
Тие нагласуваат дека еден оброк сам по себе нема да предизвика рак, но долгорочните навики во исхраната можат да влијаат врз зголемувањето или намалувањето на ризикот.
Како поздрав избор за појадок, експертите препорачуваат грчки јогурт со бобесто овошје, јајца со интегрален леб или овесна каша со овошје и јаткасти плодови. Според нив, комбинацијата од протеини и растителни влакна помага да се одржи стабилно ниво на шеќер во крвта и подолго чувство на ситост.
