Опаѓа бројот на нови случаи на западнонилска треска

Бројот на новите случаи на западнонилска треска во земјава бележи пад, информира министерот за здравство Сашо Клековски.

— реклама —

Во периодот од 24 до 31 август биле регистрирани вкупно пет нови случаи, од кои три се лабораториски потврдени. Тоа е значително намалување во споредба со претходните три недели, кога неделно имало меѓу девет и 11 случаи.

— реклама —

Најголем број хоспитализации бил забележан на 12 август, кога на болничко лекување биле 24 пациенти. Според податоците, мажите заболуваат 3,7 пати почесто од жените, а сите досегашни смртни случаи се кај мажи.

Заклучно со денеска, во земјава се евидентирани 55 случаи на западнонилска треска, од кои 53 се потврдени. Повеќе од половината од пациентите веќе се отпуштени од болничко лекување.

— реклама —

Од Министерството за здравство посочуваат дека податоците за бројот на заболени и излекувани, како и мапирањето на случаите по општини, ризичните водни површини и спроведените третмани, се јавно достапни на платформата healthalert.mk.

— реклама —

Клековски порача дека мерките за заштита продолжуваат и упати апел до граѓаните и натаму да ги почитуваат препораките за лична заштита од комарци.