Несекојдневна, но и загрижувачка глетка е забележана на црногорското приморје, откако член на Фејсбук групата „Општина Рисан“ фотографирал риба лав – вид познат по своите отровни боцки.
Рибата лав е предатор кој најчесто престојува во близина на карпестото морско дно, а се препознава по впечатливиот изглед и долгите боцки исполнети со отров. Нејзиниот убод може да предизвика силни болки кои траат со денови, грчење на мускулите, засилено потење и проблеми со дишењето.
Фотографијата предизвика бројни реакции на социјалните мрежи, при што дел од граѓаните изразија загриженост поради присуството на овој вид во Јадранското Море.
Доколку дојде до убод од риба лав, експертите советуваат погоденото место веднаш да се потопи во топла вода, а потоа лицето што е можно побрзо да побара лекарска помош.
Природното живеалиште на рибата лав се Индискиот Океан и Црвеното Море, но во последните години овој вид сè почесто се забележува и во Средоземното Море, најчесто преку Суецкиот Канал.
Во меѓувреме, присуството на опасни морски видови е актуелна тема и во Грција, каде неодамна беше пријавен инцидент во кој риба зајак, позната и како лагокефалос, наводно каснала капачка на плажа во Пефкохори на Халкидики.
