Водата во Гостивар сè уште не е безбедна за пиење и употреба, бидејќи во неа е утврдено присуство на бактеријата Pseudomonas aeruginosa, која претставува ризик по здравјето на луѓето. Ова денес го соопшти директорот на Дирекцијата за заштита и спасување, Стојанче Ангелов.
„Постои присуство на Pseudomonas aeruginosa во водата за пиење. Овие бактерии ја прават водата микробиолошки неисправна и небезбедна за консумирање, бидејќи се опасни за здравјето, особено за лицата со ослабен имунитет“, изјави Ангелов.
Тој појасни дека бактеријата може да предизвика инфекции на кожата, очите и ушите, како и инфекции на уринарниот тракт и белите дробови кај почувствителни лица. Дополнително, таа се одликува со висока отпорност на многу вообичаени антибиотици.
За потребите на жителите на Гостивар денес се ангажирани три цистерни со питка и техничка вода.
„Едната е од Територијалната противпожарна единица Гостивар, една од ‘Бехтел и Енка’, а една од Општина Боговиње. Досега двапати беа упатени кон граѓаните, а до вечерва се планирани уште две тури. Дистрибуцијата се врши во тесна координација со Општинскиот штаб за заштита и спасување на Општина Гостивар“, рече Ангелов.
Иако властите претходно најавуваа дека до крајот на минатата недела водата ќе биде исправна за пиење, жителите и натаму се снабдуваат со вода преку цистерни.
Во меѓувреме, Министерството за здравство соопшти дека во текот на вчерашниот ден во болницата во Гостивар биле регистрирани 84 први прегледи, што е за 27 повеќе во однос на претходниот ден, кога биле евидентирани 57 прегледи.
„И покрај дневното зголемување, бројот на прегледи останува значително понизок во однос на пикот од 18 јули, кога беа регистрирани 649 прегледи“, информираат од Министерството за здравство, додавајќи дека епидемиолошката состојба во Гостивар останува стабилна и континуирано се следи од надлежните здравствени институции.
