Грчките служби за цивилна заштита се ставени во состојба на зголемена готовност поради многу висок ризик од избувнување и ширење шумски пожари во повеќе делови од земјата.
Според дневната мапа за процена на ризикот од пожари, за неколку региони е прогласен четврти степен на опасност, што значи дека временските услови се исклучително поволни за брзо ширење на пожарите.
Најголем ризик е прогласен на островите Хиос, Лезбос, Самос и Икарија, во регионот Додеканез, како и во регионалните единици Ласити и Ираклион на островот Крит.
Висок ризик од пожари, односно трет степен на опасност, денес е на сила и во областа Атика, како и во повеќе други островски и копнени делови на Грција.
Од Цивилната заштита ги повикаа граѓаните и туристите да бидат особено внимателни и да избегнуваат активности што можат да предизвикаат пожар, како што се палење сува вегетација и растителен отпад, користење алати што создаваат искри, заварување, палење скара на отворено и фрлање отпушоци од цигари.
