Опозицијата во Бугарија бара оставка од владата по трагедијата на автопатот „Тракија“

Бугарската опозициска партија ГЕРБ побара оставка од премиерот Румен Радев и од министрите кои, според неа, носат одговорност за двете тешки сообраќајни несреќи на автопатот „Тракија“. Партијата најави дека ќе почне да собира потписи за гласање недоверба на Владата поради пропустите во организацијата на безбедноста во сообраќајот.

— реклама —

Ставот на ГЕРБ го соопшти заменик-претседателот Даниел Митов на прес-конференција во бугарското Народно собрание. Тој изрази сочувство на семејствата на загинатите и рече дека партијата не планирала политичка реакција на денот на трагедијата, но одговорот на власта ја поттикнал да се огласи.

Поранешниот министер за регионален развој Николај Нанков ја обвини власта дека не реагирала навреме на предупредувањата за опасните временски услови. Според него, во ситуацискиот центар на АПИ имало информации за очекувана густа магла, а камерите покажувале значително намалена видливост најмалку еден час пред несреќите.

— реклама —

Нанков тврди дека надлежните не ја ограничиле брзината, не ја обезбедиле делницата и не презеле мерки против замрзнување на коловозот.

— реклама —

Тој посочи и дека со наредба од 19 август биле ограничени одредени активности за редовно одржување на државните патишта, вклучително и поставувањето сообраќајни знаци, обележувањето на коловозот и подготовките за зимската сезона.

Дополнително, Нанков го отвори прашањето за проектот за поставување 40 електронски информативни табли на автопатот „Тракија“. Договорот бил склучен во 2020 година, но бил раскинат две години подоцна, без да бидат поставени таблите.

— реклама —

ГЕРБ најави собирање потписи за иницијатива за гласање недоверба, но предлогот сè уште не е официјално поднесен во бугарското Народно собрание.