Се испитува и квалитетот на асфалтот по трагедијата во Бугарија: Девет истражители на терен, прогласен ден на жалост

Бројот на загинати во двете верижни сообраќајни несреќи на автопатот „Тракија“ во Бугарија се искачи на 12, соопшти бугарскиот премиер Румен Радев, кој го посети местото на трагедијата кај патниот јазол „Зимница“.

Поради големиот број жртви, бугарската Влада утре, 11 ноември, ќе прогласи ден на национална жалост, јавува Бугарската телеграфска агенција (БТА).

— реклама —

Според најновите информации од министерката за здравство Катја Ивкова, вкупно 51 повредено лице е пренесено во болниците во Сливен, Јамбол и Бургас, од кои 13 се тешко повредени. Еден од пациентите веќе бил опериран во Бургас.

— реклама —

Здравствените власти ги мобилизирале и болниците во Софија, Хасково, Стара Загора и Пловдив, додека два воени авиона „Спартан“ и два хеликоптера „Кугар“ се ставени во готовност за евентуален транспорт на повредените.

Паралелно, започнува детална истрага за причините за несреќите, во кои учествувале вкупно 86 возила. Деветмина истражители треба да ја испитаат состојбата на коловозот, а веќе се земаат примероци од асфалтот и се проверува патната сигнализација.

— реклама —

Според министерот за внатрешни работи Иван Демерџиев, маглата нагло се згуснала, додека како можна причина за втората несреќа се разгледува тоа што возачи во спротивната насока ја намалиле брзината за да видат што се случува.

— реклама —

Премиерот Радев најави дека ќе се испитува и квалитетот на претходните патни ремонти, а од Обвинителството очекува да ги разгледа ревизорските наоди за евентуални неправилности.

Бугарскиот Црвен крст и здравствените установи упатија апели за доброволно дарување крв, додека Владата најави финансиска помош за семејствата на жртвите и за повредените.