Судот го прифати предлогот на Обвинителството и му определи 30-дневен притвор на газдата на „Пулс“, Дејан Јованов-Деко од Кочани, осомничен за давање поткуп на службено лице во Министерството за економија со цел да обезбеди лиценца за работа на угостителскиот објект „Пулс“.
Против Јованов е отворена нова истражна постапка за кривичното дело „Давање поткуп“ од член 358 став 1 од Кривичниот законик. Според Обвинителството, тој на службено лице му дал поткуп за да преземе службено дејствие што не смеело да го изврши и да му обезбеди лиценца за вршење угостителска дејност.
Обвинителите тврдат дека лиценцата била обезбедена иако за неа воопшто не било поднесено барање и иако Јованов знаел дека објектот не ги исполнува законските услови.
Како причини за барањето притвор, Обвинителството ја наведе опасноста од бегство, како и фактот дека против Јованов веќе се води постапка за „Тешки дела против општата сигурност“ во врска со пожарот во „Пулс“.
Од Обвинителството претходно посочија дека новиот предлог за притвор е поднесен во момент кога истекуваат законските рокови за неговото обезбедување во постапката за пожарот, додека во новата истрага продолжува прибирањето докази за сомнението за поткуп.
За делото „Давање поткуп“ е предвидена затворска казна од една до десет години.
Обвинителството соопшти и дека службеното лице кое, според сомненијата, го примило поткупот, веќе е обвинето и против него се води судска постапка за „Примање поткуп“.
Одбраната, пак, претходно оцени дека новата постапка претставува обид Јованов да остане во притвор и по истекот на роковите во предметот за пожарот.
Станува збор за тврдења на одбраната, додека Обвинителството наведува дека продолжува да прибира докази за сомнението за поткуп и дека постои опасност од бегство.
