Општина Карпош ги засилува превентивните активности поради присуството на вирусот на Западнонилската треска и регистрираните случаи, при што во координација со надлежните институции продолжува да ги следи состојбите и да спроведува мерки за намалување на ризикот по здравјето на граѓаните.
На 19 август, во Град Скопје се одржал координативен состанок со градоначалниците на скопските општини, на кој биле разгледани надлежностите на општините и Градот Скопје, како и дополнителните превентивни и заштитни мерки. Општина Карпош учествувала и на состанок со Министерството за здравство, каде што биле разгледани актуелната состојба со заразените лица, присуството на вирусот кај мртви птици, потенцијалните жаришта во Скопје и мерките за заштита на населението.
Како дел од превентивните активности, денеска било извршено дополнително авионско прскање против ларви на комарци, а во недела, во вечерните часови, е предвидено и дополнително теренско прскање против возрасни комарци. Дезинсекцијата се спроведува на однапред утврдени критични локации каде што има услови за задржување вода и размножување на комарци.
Од мај досега, согласно годишните планови и законските обврски на Град Скопје, реализирани се три авионски и четири теренски прскања против ларви на комарци, како и три авионски и три теренски прскања против возрасни комарци.
Од Општината апелираат и до граѓаните да преземат мерки во своите домови и околината, особено на местата каде што може да се задржува вода. Се препорачува да се проверат дворовите, терасите и заедничките површини и да се отстранат садовите, саксиите, кантите, непокриените резервоари и другите места во кои може да се собира дождовница. Граѓаните се повикуваат и да пријават неисправни хидранти и други потенцијални жаришта.
Општина Карпош посебно апелира да не се допираат мртви птици со голи раце. Доколку биде забележана мртва птица, таа треба да се пријави во Агенцијата за храна и ветеринарство, по што надлежните служби ќе организираат нејзино преземање и понатамошни анализи.
За пријавување достапен е телефонскиот број 070/771-111.
Општина Карпош најавува дека ќе продолжи со превентивните активности и координацијата со Град Скопје и надлежните институции, додека од граѓаните бара одговорно однесување и навремено пријавување на потенцијалните жаришта.
