Организаторите на иницијативата „Разговори за иднината“ бараат оставки од Славески и Димитриеска-Кочоска по случајот со „Алта банка“ Битола

Организаторите на иницијативата „Разговори за иднината во 12:05“ бараат итни мерки за стабилизирање на банкарскиот систем и враќање на довербата на граѓаните по воведувањето привремена администрација во „Алта банка“ Битола. Тие бараат преиспитување на ограничувањето за повлекување готовина, оставки од гувернерот Трајко Славески и министерката за финансии Гордана Димитриеска-Кочоска, како и свикување вонредна седница на Советот за безбедност.

Во соопштението оценуваат дека случувањата поврзани со работењето на банката претставуваат сериозен ризик за стабилноста на банкарскиот и финансискиот систем во Македонија. Тие тврдат дека влезот на „Алта банка“ во земјава бил проследен со сомнителни политички околности и недоволна транспарентност, посочувајќи ја и улогата на Министерството за финансии и Владата во процесот на преземање на битолската банка.

— реклама —

Организаторите потсетуваат дека „Алта банка“ од Белград презела постојна осигурителна компанија од Битола и основала „Алта осигурување“ во Скопје, а според медиумските најави се подготвувало и преземање на „Силк Роуд банка“.

Како дополнителен показател за состојбата го наведуваат финансискиот резултат на „Алта банка“ Битола, која во првите девет месеци од 2026 година остварила загуба од 791.000 евра. Тие сметаат дека институциите не реагирале соодветно на ризиците и ја критикуваат Народната банка за начинот на кој постапила по случајот.

— реклама —

Посебно бараат да се преиспита неделниот лимит од 10.000 денари за повлекување готовина и на граѓаните да им се овозможи пристап до сопствените средства. Според нив, ограничувањето создава дополнителна загриженост и нееднаков третман на клиентите. Бараат и итна процена на способноста за работење на „Алта осигурување“, со цел да се спречи евентуално загрозување на исплатата на осигурителните штети.

Во соопштението се нагласува дека особено важна е поддршката за граѓаните и компаниите во Пелагонискиот Регион, а се предупредува и на можните последици врз довербата во останатите банки.

Меѓу конкретните барања е гувернерот Трајко Славески да ја депонира својата оставка во Собранието, со одложено стапување во сила по донесувањето на неопходните мерки за заштита на средствата на граѓаните и компаниите. Оставка бараат и од министерката за финансии Гордана Димитриеска-Кочоска, наведувајќи дека тоа би било чин на политичка одговорност.

— реклама —

Дополнително, бараат претседателката Гордана Силјановска-Давкова да свика вонредна седница на Советот за безбедност, на која би учествувале претставници на Народната банка и надлежните финансиски институции. Целта, според организаторите, е да се разгледаат околностите под кои бил дозволен влезот на странски капитал во банкарскиот сектор и да се утврдат мерки за заштита на граѓаните и стопанството.

„На Македонија не смее да ѝ се случи нов ТАТ или Еуростандард банка“, порачуваат организаторите, повикувајќи на итни институционални постапки за стабилизација на состојбата.

— реклама —