Платформата „Разговори за иднината 12:05“ бара оставки од Тошковски, Муцунски и Шасивари по бегството на Ива Михаилова

Случајот со Ива Михаилова, која замина во Бугарија и покрај тоа што ѝ биле одземени македонскиот и бугарскиот пасош, предизвика нови политички реакции. Платформата „Разговори за иднината 12:05“ бара оставки од министрите Панче Тошковски, Тимчо Муцунски и Јетон Шасивари, како и реакција од Европската комисија.

Од платформата оценуваат дека случајот е уште еден показател за сериозни слабости во функционирањето на државните институции. Во соопштението, насловено „На политичкото водство на државните институции му е неопходна шок-терапија“, од Владата бараат да одговори дали за заминувањето на Михаилова било разговарано на минатонеделната средба во Софија меѓу министрите за надворешни работи на Македонија и Бугарија, Тимчо Муцунски и Велислава Петрова-Чамова.

— реклама —

Платформата прашува и дали евентуалниот договор за случајот би бил поврзан со распишување предвремени парламентарни избори и процесот на уставни измени. Доколку Владата ги отфрли ваквите сомневања, од платформата бараат да ја признае, како што велат, институционалната неспособност и да побара помош од меѓународните партнери.

Дополнително, тие бараат итни оставки од министерот за внатрешни работи Панче Тошковски, министерот за надворешни работи Тимчо Муцунски и министерот за правда Јетон Шасивари.

Од платформата, чии членови се поранешни и актуелни функционери на СДСМ кои се залагаат за реформи во партијата, ја повикуваат Европската комисија да побара од официјална Софија да престане со, како што наведуваат, политичките провокации и веднаш да ја предаде Михаилова на македонските правосудни органи. Во спротивно, предупредуваат дека ваквите случувања можат да го засилат притисокот за преиспитување на Договорот за добрососедски односи со Бугарија.

— реклама —

Во соопштението се потсетува и на повеќе случаи на лица кои во изминатите 35 години ја напуштиле државата и избегнале соочување со правдата. Меѓу нив платформата ги наведува Сашо Даравелски, Никола Груевски, Горан Грујовски, Никола Бошковски, Васко Ковачевски, Алил Демири и Африм Исмаиловиќ, како и Артан Груби и Перпарим Бајрами. Според платформата, за овие случаи не била преземена соодветна институционална одговорност.

Реакции за случајот претходно упатија и опозициските СДСМ и Левица, кои побараа одговорност и оставка од Тошковски.

— реклама —

Веста дека Михаилова, жителка на Кочани со македонско и бугарско државјанство, заминала во Бугарија во придружба на бугарскиот адвокат Николај Димитров ја објави бугарската телевизија БТВ. Таа изјавила дека одлучила да се врати во Бугарија поради влошената здравствена состојба.

Македонските власти соопштија дека нејзиното преминување не било евидентирано ниту од македонската ниту од бугарската гранична полиција. Михаилова, пак, тврдела дека границата ја поминала легално, користејќи лични документи.

Нејзините два пасоша ѝ биле одземени во октомври минатата година по сообраќајната несреќа со смртни последици, за која ѝ се суди во Кочани.